Obojili nebo za rekord

Dronovi izveli svjetlosnu predstavu po motivima Van Goga

21:46, 02.05.2021.
Kineska kompanija za proizvodnju dronova EFYI Grup u saradnji s Univerzitetom u Tijanđinu u tom je gradu "obojila" nebo nekim od motiva sa poznatih slika Vinsenta van Goga.

Riječ je o dijelu velike svjetlosne predstave pod nazivom "U čast Van Goga", u kojoj je čak 600 dronova iskorišćeno da se kroz animaciju ispriča priča o životu slavnog slikara i prikažu mnoga njegova djela.

Cijela predstava je trajala 26 minuta i 19 sekundi, što je novi svjetski rekord kada je riječ o animacijama s dronovima.

Za ovaj performans korištene su letjelice Edžil Bi II, koje su teške oko 1,36 kilograma i dostižu brzinu od 30 kilometara na sat. Maksimalan period koji ovi dronovi mogu provesti u vazduhu iznosi 38 minuta, prenosi portal Klix.

Osim što je pokazala važne trenutke života velikog slikara, svjetlosna predstava "U čast Van Goga" skrenula je pažnju na mnoga njegova djela, kao što su "Zvijezdana noć", "Žitno polje sa čempresima", "Umjetnikova spavaća soba u Arlu", njegov serijal slika suncokreta i autoportreti.